பால் போல ஒரு பாடல்

 சில பாடல்கள் பிடித்து விடுகிறது.. இசையோ குரலோ எதுவோ பிடித்து விடுகிறது. நமக்கு சிலரைப் பிடிக்கும். அவருக்கு ஒரு பாடல் பிடித்தால் நமக்கும் பிடித்து விடும். பத்து பனிரெண்டு வயதில் நமது விருப்பங்கள் அப்படித்தானே?  என்னுடைய தாய் மாமனுக்கு அந்தப் பாடல் பிடிக்கும்.

அது எந்தப் பாடல்? சொல்கிறேன். “மாமன்மார் மூவர் தம்பி” என்று அம்மா

அடிக்கடி பாடுவார். எனக்கு அன்பான மூன்று மாமன்கள். அவர்களில்

எல்லோருக்கும் இளையவருக்குத்தான் நான் சொல்லப் போகும் பாடல்

பிடிக்கும். மாமா மதுரைக்கு வருவார். வருடத்தில் ஓரிரு முறை. பூனைக்குட்டிகளைப் போல் அவரைச் சுற்றிச் சுற்றி வருவது எங்கள் வழக்கம். தின்பதற்கு வாங்கி வந்ததைத் தருவார். அப்படி  ஒருமுறை வந்த சமயம் பாடல் எங்கோ ஒலித்தது. அது “பால் போலவே “என்று தொடங்கியது. மாமா ஒரு கணம் காதில் வாங்கினார். அந்தப் பாடல் வந்த திசையை நோக்கி நடந்தார்-வழக்கம் போல நானும் அவர் பின்னால் நடந்தேன்- பாடல் முழுதும் கேட்டு ரசித்தார். நானும்.

பாடல் காட்டிய உணர்வுகளோ இசை நுணுக்கமோ அப்போது புரியவில்லை.-

இப்போது கொஞ்சம் புரிகிறது. கேட்டால் இனிக்கிறது. மலையில் அந்தப் பெண்

பாடுகிறாள். பனி மூட்டத்தின் நடுவே பாடுகிறாள். தனது தலைவனை எண்ணிப் பாடுகிறாள். தன் தனிமையை உணர்ந்து பாடுகிறாள். தென்றலோடும் நிலவோடும் கிளக்கிறாள். “பால் போலவே” என்று குரல் உயர்ந்து எழுகிறது.

நாளை இந்த வேளை பார்த்து ஒடி வா நிலா. என்று பாடியதும் புல்லாங்குழல்

கனிந்து ஒலிக்கிறது. என்ன சொல்வது?  பாரதியின் வரிகள்தான் நினைவில்

வருகிறது.

குன்றி னின்றும் வருகுவதோ?-மரக்

கொம்பினின்றும் வருகுவதோ?-வெளி

மன்றினின்று வருகுவதோ?-என்தன்

மதி மருண்டிடச் செய்குதடி

உண்மை. மதி மருண்டுதான் போகிறது. "காதினில் அமுது நெஞ்சினில் நஞ்சு." உணர்ந்து பாடுகிறார் சுசீலா அம்மையார். நயமான தமிழ் வரிகளை. இத்தனைக்கும் இவர் தாய் மொழி தெலுங்கு. நல்ல இசைக் கோவை. மறக்க முடியாத பாடல்.-

"மன்னன் நடந்த பாதையில் என் கால்கள் செல்வதேன்" என்று ஒரு வரி இந்தப் பாடலில் வரும். கண்ணன் நடந்த பாதையில் என் கால்கள் சென்றது 

நினைவில் வரும். கண்ணன் என்பது மாமாவின் பெயர்.

பாடலைக் கேட்கலாம்.